پاکستانی ٹیم بہت اچھی ہے،انگلینڈ کرکٹ ہیڈ کوچ

ٹیلنٹ (نمایندہ، لاہور) انگلینڈ کرکٹ ٹیم کے ہیڈ کوچ میتھیو ماٹ نے کہا ہے کہ پاکستان نے اچھے کھیل کا مظاہرہ کیا اور چوتھے ٹی ٹوئنٹی میچ میں کامیابی حاصل کرکے سیریز 2-2 سے برابر کر ڈالی۔انھوں نے کہا کہ بحیثیت مجموعی میں اپنی ٹیم کے کھلاڑیوں کی کارکردگی سے مطمئن ہوں،عالمی کپ کے پیش نظر ہم جوز بٹلر  کے حوالے سے رسک نہیں لینا چاہتے۔

میچ کے بعد میڈیا کانفرنس سے خطاب کرتے ہوئے انہوں نے کہا کہ  یہ ایک شاندار میچ تھا،لوگوں نے بہت انجوائے کیا،ہمارے پاس موقعہ تھا کہ میچ اپنے نام کرتے،پاکستان کی ٹیم بہت اچھی ہے،ہمارے کھلاڑیوں نے اچھا کھیل پیش کیا،میں اپنے کھلاڑیوں کی کارکردگی سے مطمئن ہوں۔

ان کا کہنا تھا کہ ورلڈکپ سے قبل ہم جوز بٹلر پر رسک نہیں لینا چاہتے،اگر بٹلر  نےبہتر محسوس کیا تو وہ آخری میچ کھیلیں گے، کراچی کے شائقین قابل تعریف تھے، ہم چاہتے تھے کہ اچھی کرکٹ کھیل کر لوگوں کو خوش کریں،ہم کافی عرصے بعد پاکستان آئے ہیں اور  کراچی میں بہت  لطف اٹھایا۔