آل پاکستان انٹر کلب آرچری: راشد مسعود اور شہوار کا گولڈ میڈل

کراچی (نمایندہ ٹیلنٹ) راشد مسعود اور شہوار ناصر نے آل پاکستان انٹر کلب آرچری چیمپئن شپ کے پروفیشنل سنگلز میں گولڈ میڈل جیت لیا، ٹیم ایونٹ مینز میں وائٹ ہاؤس آرچری کلب اور ویمنز میں رائٹ آرچرز کلب فاتح رہا۔ کیو اے اے آرچری ڈیولپمنٹ کے زیر اہتمام کراچی یونیورسٹی میں منعقدہ اپنی نوعیت کی پہلی آل پاکستان انٹر کلب آرچری چیمپئن شپ کا انعقاد کیا گیا جس میں 20 سے زائد کلبز کے 150 مرد و خواتین تیز اندازوں نے بھر پور شرکت کی۔ 30 میٹرز پر مشتمل اس چیمپئن شپ کی افتتاحی تقریب کے مہمان خصوصی کراچی یونیورسٹی کے ڈائرکٹر فزیکل ایجوکیشن راشد قریشی تھے جنہوں نے ایونٹ کا افتتاح کیا جبکہ اختتامی تقریب میں اسپورٹس فار آل کے چیئر مین شاہد ہاشمی مہمان خصوصی تھے جنہوں نے کامیاب تیر اندازوں میں انعامات اور ٹرافی تقسیم کیں۔

اس موقع پر خورشید عالم، انٹر نیشنل کوچ حسان عبداللہ اور دیگر بھی موجود تھے۔ نتائج کے مطابق پروفیشنل مینز میں پاک آرچری این سی سی کے راشد مسعود نے گولڈ، ناصر احمد نے سلور اور تحسین علی نے برانز میڈل حاصل کیا۔ پروفیشنل ویمنز میں رائٹ آرچرز کراچی کی شہوار ناصر نے گولڈ، ایم ایس بی کی کنول حسان نے سلور اور مریم توصیف نے برانز میڈل جیتا۔

پروفیشنل مینز (کلب) کے ٹیم ایونٹ میں وائٹ ہاؤس آرچری کلب نے میدان مار لیا، وائٹ ہاؤس آرچری کلب میں انیق حسین، شہزاد احمد میر اور سید غلام علی نے گولڈ میڈل جیتا۔ رائٹ آرچرز کلب نے سلور اور کے یو آرچری کلب نے برانز میڈل حاصل کیا۔ پروفیشنل ویمنز (کلب) ٹیم ایونٹ میں مریم توصیف، شہوار ناصر اور شیزل ناصر پر مشتمل آرچرز نے اپنے کلب رائٹ آرچرز کو گولڈ میڈل جتوایا، ایم ایس بی آرچری کلب نے سلور اور ڈی ایم سی آرچری کلب فیصل نے برانز میڈل جیتا۔