مِنی اردو ہائیکو مشاعرے کا انعقاد

کراچی (نمایندہ ٹیلنٹ) پاکستان جاپان کلچرل ایسوسی ایشن اور آرٹس کونسل آف پاکستان کراچی کے اشتراک سے قونصل خانہ جاپان،کراچی کے زیرِ سرپرستی منِی اردو ہائیکو مشاعرے کا انعقاد ہوا۔ مشاعرے کا آغاز اللہ تعالیٰ کے بابرکت نام سے ہوا۔ تلاوت قرآن پاک کی سعادت مقامی یونین کونسل کے چیئرمین ڈاکٹر خالد محمود نے حاصل کی۔

مشاعرے کی صدارت معروف ماہر ِتعلیم، شاعر، ادیب، محقق و نقاد پروفیسر سحر انصاری نےکی جبکہ معراج جامی اس مشاعرے میں مہمان خصوصی کی حیثیت سے شریک تھے۔ مشاعرے کی نظامت کے فرائض وضاحت نسیم نے سر انجام دیے جو بذاتِ خود معروف شاعرہ بھی ہیں اور جاپانی زبان کی استاد بھی۔

پی جے سی اے سندھ کے جنرل سیکریٹری سلیم احمد نے مشاعرے سے قبل اپنے خطاب میں کہا کہ آرٹس کونسل آف پاکستان کراچی، ڈسٹرکٹ سینٹرل میں ہائیکو شاعرے کے انعقاد کا مقصد اس آرٹس کونسل کے گردو نواح میں رہنے والے صاحبانِ ذوق کو ہائیکو صنفِ سخن سے روشناس کروانا ہے۔ سلیم صاحب نے اس بات کا بھی اعادہ کیا کہ پی جے سی اے سندھ، آرٹس کونسل آف پاکستان کراچی کے اشتراک سے آرٹس کونسل ڈسٹرکٹ سینٹرل کے قرب و جوار میں بسنے والے احبابِ ذوق کے لیے آیندہ بھی یہاں ہائیکو مشاعروں کا انعقاد کرتے رہیں گے۔ سلیم احمد نے قونصل خانہ جاپان، کراچی اور پی جے سی اے سندھ کی نمایندگی کرتے ہوئے آرٹس کونسل کی انتظامیہ، صدرِ مشاعرہ محترم پروفیسر سحر انصاری اور مہمانِ خصوصی سید معراج م جامی اور تما م حاضرینِ محفل کا مشاعرے میں شرکت اور اسے کامیاب بنانے پر شکریہ ادا کیا۔

 یاد رہے کہ آرٹس کونسل آف پاکستان کراچی، ڈسٹرکٹ سینٹرل کا قیام جب سے عمل میں آیا ہے یہاں ہائیکو مشاعرے کا انعقاد پہلی بار ہوا ہے۔ آرٹس کونسل آف پاکستان کراچی، ڈسٹرکٹ سینٹرل کے کو آرڈینیٹر رومی شمائل اور شاہد محی الدین نے بھی آرٹس کونسل کی نمائندگی کرتے ہوئے حاضرینِ محفل سے خطاب کیا۔ مشاعرے میں شریک شعرائے کرام میں شاہ فہد، فاروق احمد ذاکر، زاہد حسین، شازیہ عالم شازی، حمیدہ کشش، افروز رضوی، سید انور جاوید ہاشمی، شہزاد نیاز، صفدر علی انشائ، یاسر چغتائی شامل تھے۔ نظامت کار محترمہ وضاحت نسیم نے مشاعرے کے آغاز پر ہی اپنی ہائیکو پیش کیں۔

 مشاعرے کے اختتام سے قبل مہمان خصوصی معراج جامی اور صدر مشاعرہ پروفیسر سحر انصاری نے اپنے ہائیکو کلام سے حاضرینِ محفل کو محظوظ کیا۔ بعد ازاں مشاعرہ پروفیسر سحر انصاری کے صدارتی خطاب پر اختتام پذیر ہوا۔