غزل

گردِ ملال چہرہ دل پہ جمی نہ تھی

اِتنی اُداس صبح تو پہلے کبھی نہ تھی

تم ہی نے دستِ شوق بڑھا کر ہٹا لیا

ورنہ میرے خلوص میں کوئی کمی نہ تھی

ہاں، تم کو جس نگاہ سے دیکھا ہے اس کے بعد

میری نظر میں کوئی بھی صورت جچی نہ تھی

اب اس طرح سے ملتے ہیں جیسے ہوں اجنبی

یا یہ کہ ان کو ہم سے کبھی دوستی نہ تھی

ضبطِ الم کہوں کہ اسے انتہائے غم

دل رو رہا تھا آنکھ میں میرے نمی نہ تھی

افسوس! وہ کسی کے شریکِ سفر ہوئے

ایسی خبر تو ابنِ حسن نے سُنی نہ تھی