تم اُسے ووٹ دو

تم اُسے ووٹ دو

جو تمہارے قبیلے سے ہو

قوم سے ذات سے

اور صوبے سے ہو

اُس کا کردار مت دیکھنا

وہ بھلے سے شرابی ہی ہو

چلو راشی ہو،زانی بھی ہو

لیکن اپنا تو ہو

اگر مارے بھی وہ

چھاؤں میں تو رکھے

اگر لوٹے بھی وہ

کچھ اِدھر بھی تو دے

اور ویسے بھی

تم کو کاموں سے کیا ؟

اس ترقی سے کیا

روڈ رستے بنیں نہ بنیں

صاف پانی ملے نہ،ملے

جو میسر ہے کافی ہے وہ

اور تعلیم کا فائدہ کچھ نہیں

نوکری یوں بھی ملتی نہیں

تم اسے ووٹ دو

ہم زباں ہو تمہارے ہی کلچر سے ہو

اس کا کردار مت دیکھنا

اسپتالوں میں جائیں ہی کیوں

اللہ صحت مند رکھے

یہ جو مہنگائی ہے

ہے سبھی کے لیے

ملک ترقی کرے نہ کرے

ملک مقروض ہو

اس کا تم سے تعلق ہی کیا ؟

ذمے داری تمہاری نہیں

تم تو چھوٹے شہر سے محلے سے ہو

بس تو پھر طے ہوا

تم اسے ووٹ دو

جو تمہارے قبیلے سے ہو