سلامِ عقیدت حضرت علیؓ

 

بہر صورت عظیم الشان ٹھہرے

نبی کے علم کی پہچان ٹھہرے

سدا پیشِ نظر قرآن رکھا

ہمیشہ عدل میں میزان ٹھہرے

وہ تھے بابِ دیارِ علم و حکمت

طریقت کے ضیا سامان ٹھہرے

جو دیں من کُنت مولا کی صدائیں

مِرے غم میں وہ میرا مان ٹھہرے

محمد مصطفےٰ ﷺ کی نسبتوں سے

اسد اللہ عالی شان ٹھہرے

پدر حسنینؓ کے‘ زینب کے بابا

وہی تو فاطمہ کی جان ٹھہرے

علیؓ کو چُن لیا تھا مصطفےٰ ﷺ نے

شبِ ہجرت کا وہ عنوان ٹھہرے