غزل

خوش کن لمحوں کی مرہون ہے نظر عنایت کیا

جب یہ بھید نہ جانو تو پھر اس کی وضاحت کیا

کاش دعائیں اور تمنائیں بھی نظر آئیں

دیکھیں حرف محبت کیا ہے حسن سماعت کیا

ایک تواتر شام و سحر کا رکھتا ہے مصروف

فطرت نے اس حسن عمل میں رکھی غایت کیا

تیر گئی خوشبو سی ہوا میں رنگ نظر آئے

پائی گل لالہ میں ہم نے اس کی شباہت کیا

جگ والوں کی دنیا اور ہے دل والوں کی اور

پتھریلے لہجوں سے کہے پھولوں کی لطافت کیا

اچھے لوگوں سے ملنے کا شوق برا تو نہ تھا

الگ تھلگ چپ رہنے کی اب ہوگئی عادت کیا

پیار بھری دلدار فضا میں گیت ابھرتے ہیں

رنگ سخن سے ہم آمیز ہے حسن عبارت کیا